Lajmet

Prishtinë, 30 gusht 2024 - Dogana e Kosovës përmbylli sot ceremoninë solemne të shënimit të 25-vjetorit të themelimit të saj. Kjo ngjarje shënoi një moment historik për Doganën, duke reflektuar mbi arritjet e saj gjatë këtyre 25 viteve në shërbim të vendit dhe qytetarëve të Kosovës. Dogana e Kosovës ka qenë një shtyllë e rëndësishme për sigurinë dhe stabilitetin ekonomik të vendit. Ky 25-vjetor është një dëshmi e përkushtimit tonë të palëkundur për t'i shërbyer Kosovës dhe qytetarëve të saj me profesionalizëm dhe integritet të lartë.
Dogana e Kosovës ka shërbyer qensishëm në funksionimjn dhe zhvillimin e shtetit tonë. Deri më tani Dogana ka mbledhur më shumë se 20 miliard euro të hyra për shtetin e Kosovës, ndërsa veprimet për mbrojtjen e shoqërisë nga parandalimi dhe zbulimi i mallrave të ndaluara dhe atyre të rrezikshme ka qenë po ashtu me rëndësi jetike. Ngjashëm edhe ndjekja dhe penalizimi i krimit të organizuar ka ndikuar dukshëm në krijimin dhe mirëmbajtjen e një ambienti të sigurtë në Kosovë dhe më gjerë.
Ceremonia u nderua me pjesëmarrjen e lartë të Ministrave zt. Hekuran Murati, Znj. Rozeta Hajdari, zt. Nenad Rasic, Ambasadori i Britanisë së madhe zt. Jonathan Hargreaves, përfaqësues të institucioneve, komunitetit të biznesit dhe zyrës së BE-së. 
Në një fjalë rasti Drejtori i Doganës së Kosovës, z. Agron Llugaliu shprehu krenarinë e tij për arritjet e institucionit duke nënvizuar:
"Ky përvjetor është një dëshmi e përkushtimit dhe qëndresës së të gjithë atyre që kanë shërbyer në Doganën e Kosovës gjatë këtyre 25 viteve. Pavarësisht sfidave që kemi përballuar, ne kemi dalë më të fortë, më efikas dhe më të përkushtuar për të mbrojtur interesat e vendit tonë. Suksesi ynë ndahet me çdo qytetar të Kosovës, sepse për ta kemi punuar pa ndalur për të mbrojtur sundimin e ligjit dhe për të siguruar mirëqenien e shoqërisë sonë."
Më tej, Kryeministri i Republikës së Kosovës, z. Albin Kurti, në letrën e tij dërguar me rastin e 25 vjetorit të Doganës së Kosovës, theksoi rëndësinë e këtij institucioni si një komponent kyç për zhvillimin e vendit, duke e quajtur Doganën katalizator të krijimit dhe forcimit të shtetit tonë. Kryeministri vlerësoi përkushtimin në luftën kundër korrupsionit, thjeshtëzimin e procedurave doganore dhe angazhimin e palodhur të punonjësve të Doganës, të cilat kanë bërë të mundur arritjen e një rekordi historik në mbledhjen e të hyrave për shtatë mujorin e parë të këtij viti. Ai përmendi gjithashtu përpjekjet për vendosjen e ligjit në veri të Kosovës dhe rëndësinë e përkujdesjes për të ardhmen e Doganës, duke përfunduar me zotimin e tij për të vijuar me përkrahjen e parezervë ndaj Doganës së Kosovës.
Ministri i Financave, Punës dhe Transfereve, z. Hekuran Murati, në fjalën e tij, u shpreh se qeveria njeh sfidat përmes të cilave ka kaluar Dogana e Kosovës dhe se kanë punuar fort për ta mbështetur atë në misionin e saj. Ministri falënderoi Drejtorin e Përgjithshëm dhe stafin e Doganës për arritjet e jashtëzakonshme, duke theksuar rëndësinë që qeveria i jep lehtësirave tregtare, veçanërisht për prodhuesit vendorë. Ministri gjithashtu falenderoj stafin e Doganës së Kosovës për angazhimet e rëndësishme në vendosjen e rendit dhe kigjit në veriun e Kosovës, si dhe shprehu gjithashtu përkushtimin për të mbështetur Doganën në objektivat e saj për përparim dhe zhvillim të mëtejshëm.
Gjatë ceremonisë u transmetua një prezantim i veçantë që përmbledhte momentet kyçe të historisë së Doganës së Kosovës, sfidat e kaluara dhe sukseset e arritura, i cili nxori në pah transformimin dhe përparimin e institucionit ndër vite.
Në fund të ceremonisë, të ftuarit patën mundësinë të shkëmbejnë mendime dhe përvoja gjatë një kokteji rasti, duke forcuar më tej bashkëpunimin dhe partneritetet për të ardhmen.
Dogana e Kosovës shpreh mirënjohjen e saj ndaj Qeverisë së Republikës së Kosovës për përkrahjen e pa rezervë, institucioneve të zbatimit të ligjit dhe partnerët ndërkombëtarë, në veçanti Ambasadat e SHBA dhe Britanisë së Madhe, Zyrën e BE-së dhe vendet tjera të BE-së dhe synon që bashkëpunimin dhe shkëmbimet në të mirë të misionit të saj t’i sforcoj në të ardhmen.

Sot, Dogana e Kosovës shënon 25-vjetorin e themelimit. Ky përvjetor simbolizon rrugëtimin e një institucioni të përkushtuar për të mbrojtur kufijtë e vendit, për të siguruar tregtinë e ligjshme dhe për të kontribuar në zhvillimin ekonomik të Kosovës.
Gjatë këtyre 25 viteve, kemi kaluar sfida të shumta, kemi ndërtuar standarde të reja të sigurisë dhe transparencës, dhe kemi arritur suksese të rëndësishme që kanë forcuar pozicionin e Kosovës në rajon dhe më gjerë. 
Faleminderit të gjithë zyrtarëve doganorë për angazhimin dhe profesionalizmin e tyre të përditshëm, si dhe qytetarëve tanë për mbështetjen e vazhdueshme. 

Prishtinë 1 gusht 2024, Dogana e Kosovës ka arritur një sukses historik duke mbledhur mbi 1 miliard euro të hyra. Kjo arritje përfaqëson një pikë të rëndësishme për institucionin dhe për ekonominë e vendit tonë, duke reflektuar përpjekjet e vazhdueshme për të përmirësuar proceset dhe për të rritur efikasitetin e shërbimeve tona. Vlen te theksohet se qe nga themelimi i doganës e deri tani kjo është hera e parë që me datën 1 gusht arrihet kjo shumë. 
Ky rekord i ri është rezultat i një kombinimi faktorësh, duke përfshirë:
• Përmirësimin e procedurave Doganore: Implementimi i sistemeve të reja dhe teknologjive për të thjeshtuar dhe shpejtuar proceset doganore ka luajtur një rol kyç në arritjen e këtij suksesi.
• Lufta kundër kontrabandës dhe evazionit fiskal: Masat e intensifikuara dhe bashkëpunimi me agjencitë tjera të zbatimit të ligjit kanë kontribuar në uljen e kontrabandës dhe evazionit fiskal, duke rritur të hyrat.
• Transparenca dhe edukimi publik: Rritja e ndërgjegjësimit publik dhe edukimi i qytetarëve dhe bizneseve për rëndësinë e përputhshmërisë me ligjet doganore ka rezultuar në një përputhshmëri më të lartë dhe, rrjedhimisht, në të hyra më të larta.
Drejtori i përgjithshem i Doganës së Kosovës, z. Agron Llugaliu, shprehu mirënjohjen për stafin e Doganës dhe për partnerët strategjikë që kanë ndihmuar në arritjen e këtij suksesi: “Ky shtë një moment i rëndësishëm për Doganën e Kosovës dhe për të gjithë qytetarët e vendit tonë, mbledhja e 1 miliard eurove të hyra është dëshmi e punës së palodhshme, përkushtimit dhe profesionalizmit të Doganës së Kosovës”.

Prishtinë 6 Qershor 2024 Oficerët doganor në pikë kalimin kufitar të Vërmicës sot arritën të parandalojnë tentim futjen e telefonave mobil ku vlera preliminare e sasisë së kapur kalon 250000 mijë euro.  Njëri ndër zbulimet më të mëdha të telefonave gjatë tentim kontrabandimit ka ndodhur sot, ku oficerët doganor kanë zbuluar dhe ndaluar një sasi të madhe të pajisjeve elektronike. Pas ndalesës së një automjeti me targa të huaja, oficerët doganor e kanë selektuar për kontroll ku së bashku me policinë kanë ushtruar kontrollin I cili edhe ka rezultuar me ketë zbulim. Gjatë këtij kontrolli janë sekuestruar gjithsej 315 pajisje të reja, duke përfshirë:
• 260 telefona të markës iPhone, modele 13 dhe 15.
• 55 telefona të markës Samsung.
• 10 orë të zgjuara (smart watch) të serisë IX.
Ky operacion tregon vendosmërinë e institucioneve tona për të luftuar krimin e organizuar dhe për të siguruar që rregullat dhe ligjet të respektohen. Ne mbetemi të angazhuar për të garantuar sigurinë dhe mirëqenien e qytetarëve tanë duke parandaluar hyrjen e produkteve të paligjshme në tregun tonë.

Gjilan 1 qershor 2024 Dogana e Kosovës në koordinim të ngushtë me Policinë e Kosovës, ka ndërmarrë veprime operacionale të kontrolleve në rajonin e Gjilanit. Pas pranimit dhe verifikimit të informatave për dyshime për tregti të paligjshme nga disa biznese që ushtrojnë veprimtarinë e argjendarive.
Në kuadër të këtij operacioni, janë kontrolluar shtatë (7) lokacione të ndryshme, ku janë gjetur dhe sekuestruar përkohësisht:
   • 33 kg e 310 gram ari (tridhjetë e tre kilogram e treqind e dhjetë gram ari)
   • 14,650.00€ (katërmbëdhjetë mijë e gjashtëqind e pesëdhjetë euro)
   • 9,720.00 franga zvicerane (nëntë mijë e shtatëqind e njëzet franga zvicerane)
Gjatë këtij operacioni, janë arrestuar gjashtë (6) persona të dyshuar, të gjithë meshkuj kosovarë. Pas intervistimit të tyre, me vendim të prokurorit kujdestar, të arrestuarit janë dërguar në mbajtje.
Policia e Kosovës dhe Dogana e Kosovës mbeten të përkushtuara në luftën kundër aktiviteteve të paligjshme dhe korrupsionit, duke garantuar sigurinë dhe rendin për të gjithë qytetarët. Ftojmë qytetarët që të raportojnë çdo aktivitet të dyshimtë dhe të bashkëpunojnë me organet e rendit për një shoqëri më të sigurt dhe të drejtë.

Videot nga aksioni  mund ti gjeni në: https://www.facebook.com/share/p/kZ437xSWm5fwcGxG/

Prishtinë 30 Maj 2024  Dogana e Kosovës ka realizuar me sukses disa operacione kontrolli gjatë kësaj jave të cilat kanë çuar në zbulimin e aktiviteteve të ndryshme të paligjshme në disa lokacione të ndryshme të vendit. Më poshtë janë detajet e rasteve të zbuluara:

Rasti 1: Fushë Kosovë zyrtarët e Doganës së Kosovës, pas një pune operative intensive, kanë organizuar një kontroll në një subjekt në Fushë Kosovë. Gjatë këtij kontrolli, është zbuluar një hapësirë për prodhimin/falsifikimin e mallrave dhe mallra pa prejardhje të qartë. Konkretisht, janë sekuestruar:
• 9,560 copë maica për të rritur me marka të ndryshme
• 4,300 copë etiketa letre me mbishkrimin e firmave të njohura
• Disa makina qepje.
Lidhur me këtë rast, është njoftuar menjëherë Prokuroria. Pas intervistimit të palës së përfshirë, janë ngritur kallëzime penale për: Tregti të ndaluar, Prodhim të paautorizuar si dhe mashtrim të konsumatorëve.

Rasti 2: Mitrovicë, njësitet e Doganës së Kosovës kanë kryer një kontroll në një subjekt që merrej me shitjen e automjeteve të përdorura në Mitrovicë. Gjatë këtij kontrolli, janë identifikuar 37 automjete të ndryshme të pa zhdoganuara, të cilat subjekti kishte për qëllim t'i përdorte për pjesë këmbimi.
Automjetet janë dërguar për verifikim për të parë nëse janë të kërkuara, dhe pas përfundimit të kësaj procedure, rasti do të trajtohet më tej në koordinim me Prokurorinë.

Rasti 3: Gjilan, njësitet e Doganës së Kosovës kanë kryer një kontroll në një subjekt tjetër, pas pranimit të një informate përmes rrugëve operative. Gjatë këtij kontrolli, është zbuluar dhe sekuestruar mall pa dokumentacion, i cili dyshohet se është kontrabanduar në Kosovë. Malli i sekuestruar përfshin: 
• 10 copë helmeta të ndryshme për motoçikleta - të reja
• 16 copë goma të ndryshme për motoçikleta - të reja
• 3 copë maska ballore për motoçikleta Yamaha Nmax - të përdorura
Ndaj palës janë iniciuar procedurat kundërvajtëse.

Dogana e Kosovës mbetet e përkushtuar në luftën kundër veprimtarive të paligjshme dhe kontrabandës, duke siguruar integritetin dhe sigurinë e tregut tonë. Për çdo informatë shtesë, ju lutemi të kontaktoni zyrën tonë të informimit ose të vizitoni faqen tonë zyrtare.

Prishtinë 27 Maj 2024 Pas shpalljes në gazetën zyrtare, Kodi Doganor dhe të Akcizave (08/L-247), ka hyrë në zbatim. 
Ky kod përfaqëson një hap të rëndësishëm drejt modernizimit dhe efikasitetit të sistemit doganor dhe të akcizës në vendin tonë, duke synuar përmirësimin e shërbimeve dhe lehtësimin e proceseve për qytetarët dhe bizneset. Kodi i Ri i Doganave dhe Akcizës përmban një sërë përmirësimesh dhe ndryshimesh që do të kenë një ndikim pozitiv në operacionet doganore dhe proceset e akcizës. 
Disa nga pikat kryesore të këtij kodi përfshijnë:
    a) Kodi i ri synon të thjeshtojë procedurat doganore dhe të lehtësojë procesin e importit dhe eksportit të mallrave. Kjo do të ndihmojë në reduktimin e kohës dhe kostove për bizneset.
    b) Implementimi i teknologjive të reja do të përmirësojë menaxhimin dhe monitorimin e mallrave, duke rritur sigurinë dhe transparencën në proceset doganore.
    c) Masa të reja janë parashikuar për të përmirësuar kontrollin dhe monitorimin e mallrave, duke ndihmuar në parandalimin e kontrabandës dhe aktiviteteve të tjera ilegale.
    d) Kodi i ri është në përputhje me praktikat dhe standardet ndërkombëtare, duke e bërë sistemin tonë doganor më konkurrues dhe të përshtatshëm për tregtinë globale.
Dogana është e përkushtuar të ofrojë një shërbim më të mirë për qytetarët dhe bizneset tona, dhe besojmë se këto ndryshime do të kenë një ndikim pozitiv në ekonominë e vendit.

Prishtinë 17 Maj 2024 Pas shpalljes në gazetën zyrtare, Kodi Doganor dhe i Akcizave (08/L-247), do të hyjë në fuqi më 26.05.2024.
Siç parashikojnë dispozitat kalimtare dhe përfundimtare, aktet nënligjore të parapara me këtë Kod do të miratohen brenda një (1) viti nga data e hyrjes në fuqi të tij. Deri në miratimin e këtyre akteve nënligjore, do të vazhdojnë të zbatohen aktet nënligjore ekzistuese, për aq kohë sa ato nuk janë në kundërshtim me dispozitat e Kodit të ri. Me hyrjen në fuqi të Kodit të ri, do të shfuqizohen:
- Kodi nr. 03/L-109 Doganor dhe i Akcizave në Kosovë;
- Ligji nr. 04/L-099 për ndryshimin dhe plotësimin e Kodit nr. 03/L-109 Doganor dhe i Akcizave në Kosovë;
- Çdo dispozitë tjetër që është në kundërshtim me dispozitat e Kodit të ri.
Ky ndryshim i rëndësishëm synon të modernizojë dhe përmirësojë sistemin doganor dhe të akcizave në Kosovë, duke ofruar një kornizë më të qartë dhe më të efektshme. Kodi i ri është hartuar për të përmbushur standardet ndërkombëtare dhe për të lehtësuar tregtinë, duke e bërë më të thjeshtë dhe më efikas procesin e doganimit për bizneset dhe individët.

Kodi i ri Doganor dhe i Akcizave- Ndryshimet

Ndryshimet kyçe në KDA e ri

Prishtinë, 14 Maj 2024 në pikën doganore të Hanit të Elezit zyrtarët e Doganës parandaluan një tentim kontrabandimi të medikamenteve.   
Një automjet me targa kosovare  u paraqit për kontroll doganor, derisa drejtuesi i automjetit si dhe bashkudhëtarja në pyetjen e oficerëve doganor në lidhje me posedimin e mallrave u përgjigjën se nuk kishin mall për deklarim. Megjithatë, gjatë një kontrolli detaj të automjetit, u zbuluan medikamente të ndryshme të padeklaruara, të fshehura në gomat e rezervës. Llojet e medikamenteve të gjetura përfshijnë:
   OZEMPIC 1mg – 45 pako, 
   TRESIBA 5X3 ml - 20 pako, 
   RYZODEG 5X3 ml – 10 pako, 
   NOVOMIKS 5X3 ml - 20 pako, 
   JARDIANCE 10 mg - 20 pako, 
   RYBELSUS 14 mg – 8 pako, 
   RYBELSUS 7 mg – 1 pako, 
   RYBELSUS 3 mg – 1 pako.
Bazuar në këto zbulime, u konstatua se personi fizik ka kryer një kundërvajtje doganore, e cila është sanksionuar sipas nenit 276 të KDAK-së.
Ftojmë të gjithë qytetarët dhe bizneset që t'i raportojnë çdo informacion të dyshimtë dhe të ndihmojnë në luftën tonë të përbashkët kundër krimit të organizuar dhe kontrabandës.

Në një moment shumë të rëndësishëm për Doganën e Kosovës, Drejtori i Përgjithshëm z. Agron Llugaliu me një delegacion nga Dogana e Kosovës, u mirëpritën me dashamirësi nga Dogana Franceze për shkëmbimin e praktikave më të mira në procedurat doganore. Vizita, e mbështetur dhe e ndjekur nga Programi për Zhvillimin e Ligjit Tregtar të Departamentit të Tregtisë së SHBA-së (CLDP) dhe Ambasada e SHBA-së në Kosovë, kishte për qëllim të forcojë bashkëpunimin dhe shkëmbimin e ekspertizës në modernizimin e operacioneve doganore dhe rritjen e strategjive të menaxhimit të rrezikut.
Zëvendës Drejtori i Përgjithshëm Jean-François DUTHEIL priti me dashamirësi z. Llugaliu, përfaqësuesin e CLDP dhe të Ambasadës Amerikane, duke shprehur kënaqësinë e tij për rikthimin e bashkëpunimit ndërmjet administratave tona doganore. Në takim z. Llugaliu konfirmoi përkushtimin e Doganës së Kosovës për të bashkëpunuar në fusha të ndryshme me interes të përbashkët.
Gjatë vizitës, Drejtori i Përgjithshëm z.Llugaliu nënvizoi rëndësinë e madhe të menaxhimit efektiv të rrezikut në operacionet doganore. Ai theksoi nevojën për t'i dhënë përparësi hetimit penal, mbledhjes së inteligjencës dhe përpjekjeve kundër kontrabandës si shtylla themelore të modernizimit dhe efikasitetit.
Përmes bashkëpunimit me Doganën Franceze dhe CLDP, Dogana e Kosovës synon të forcojë kapacitetet e saj, të përmirësojë procedurat dhe të rrisë rolin e saj në mbrojtjen e interesave kombëtare. CLDP tashmë është një partner i rëndësishëm i Doganës së Kosovës, me mbështetjen e tyre të gjerë në përmirësimin e kapaciteteve dhe praktikës sonë.
Ky bashkëpunim nënvizon vendosmërinë e partnerëve për të çuar më tej bashkëpunimin ndërkombëtar dhe shkëmbimin e praktikave më të mira. Të gjithë partnerët u pajtuan për përshtatshmërinë e vazhdimit të bashkëpunimit dhe shkëmbimit strategjik.

Prishtinë 25 Prill 2024, Dita e sotme është përmbyllur me mbledhjen e të hyrave që tejkalojnë 500 milionë euro. Kjo arritje paraqet një rritje të madhe prej 78 milionë euro, ose mbi 18%, krahasuar me mbledhjen e të hyrave të vitit të kaluar, duke tejkaluar dukshëm edhe projeksionin prej 6% për këtë vit fiskal.
Këto të hyra janë mbledhur edhe pse efekti në lirimet e taksave sipas vendimeve të Qeverisë për importin për prodhuesit dhe thellimi i lirimeve nga marrëveshjet e tregtisë së lirë janë thelluar dukshëm. Në këtë periudhë janë liruar 79 milion euro taksa të kësaj kategorie apo 21 milion më shumë se viti paraprak.
Ngjashëm, bazuar në vendimin e Qeverisë, është bërë progres i rëndësishëm në lehtësimin e tregtisë, veçanërisht me funksionimin efikas të zhdoganimit në portin e Durrësit dhe terminaleve të operuara nga shteti. Ky progres ka rezultuar në një kursim të konsiderueshëm të kostos prej 4.3 milionë euro gjatë periudhës tre mujore, ndërsa që sipas trendit të progresit, ne parashikojmë që ky kursim të përshkallëzohet, duke arritur deri në 20 milionë euro deri në fund të vitit, duke optimizuar më tej proceset tona tregtare dhe duke përmirësuar rritjen ekonomike e njëkohësisht duke ndikuar në uljen e çmimit tek konsumatori.
Dogana e Kosovës mbetet e përkushtuar për të nxitur një mjedis të favorshëm për eksportin, tregtinë dhe gjenerimin e të ardhurave, duke kontribuar në prosperitetin dhe zhvillimin e Republikës së Kosovës.

Mitrovicë, 17 prill 2024  Njësitet Antikontrabandë të Doganës në bashkëpunim me Policinë e Kosovës, kanë arritur të ndalojnë katër raste të kontrabandimit të mallrave nga Serbia në Kosovë duke shfrytëzuar rrugët dytësore.

Në këto raste të suksesshme të parandalimit të kontrabandës, janë sekuestruar mallrat në vijim:
Rasti 1: Mallra ushqimore në peshë 220 Kg me vlerë prej 1,400.00 Euro.
Rasti 2: Mallra ushqimore dhe pije të ndryshme në sasi prej 1,530.7 Kg me vlerë prej 2,400.00 Euro.
Rasti 3: Çokollata në peshë 266 Kg me vlerë prej 1,700.00 Euro.
Rasti 4: Pije alkoolike dhe cigare (60 litra dhe 7640 cope cigare) me vlerë prej 1,300.00 Euro.

Keto operacione të suksesshëm janë rezultat i angazhimit dhe tregon përkushtimin e autoriteteve për luftën ndaj kontrabandës. Njësitet Doganës dhe Policisë së Kosovës vazhdojnë të punojnë në mënyrë të palodhshme për të mbrojtur interesat e shtetit dhe të qytetarëve nga veprimtaria e paligjshme dhe të dëmshme për shoqërinë

Dogana e Kosovës ka aplikacionin eDogana për pajisjet e mençura android dhe ios, i cili mundëson lajmërim të parregullsive dhe sjelljeve jo profesionale me komunikim të sigurt dhe gjithashtu ofron shërbime tjera me qëllim të shërbimit ndaj qytetarëve dhe komunitetit të prodhuesve dhe tregtisë në përgjithësi.