Lajmet

25 gusht 2026 –Në Prishtinë u zhvillua takimi i Drejtorëve të Përgjithshëm të Administratave Doganore të Republikës së Kosovës dhe Republikës së Maqedonisë së Veriut, me pjesëmarrjen e delegacioneve të të dyja administratave. Takimi, i udhëhequr nga Drejtori i Përgjithshëm i Doganës së Kosovës, z. Agron Llugaliu, dhe Drejtori i Përgjithshëm i Administratës Doganore të Maqedonisë së Veriut, z. Boban Nikolovski, u fokusua në forcimin e bashkëpunimit rajonal, lehtësimin e tregtisë dhe avancimin e administrimit modern doganor.
Një nga temat kryesore ishte bashkëpunimi në pikëkalimin kufitar Hani i Elezit, ku u diskutua mundësia e krijimit të një pikëkalimi të përbashkët, mbi parimet e kontrollit të integruar, me synim përshpejtimin e lëvizjes së mallrave dhe qytetarëve, si dhe reduktimin e kohës së pritjes dhe procedurave kufitare. U diskutua gjithashtu për avancimin e bashkëpunimit në pikëkalimin Glloboçicë dhe zgjerimin e mëtejshëm të bashkëpunimit operacional.
Delegacionet shkëmbyen përvoja lidhur me procesin e integrimit evropian, harmonizimin me Kodin Doganor të Bashkimit Evropian dhe zhvillimin e sistemeve moderne doganore. Vëmendje e veçantë iu kushtua tregtisë elektronike, deklaratave para mbërritjes dhe përfitimeve të tyre për operatorët ekonomikë.
Një pjesë e rëndësishme e takimit iu kushtua forcimit të bashkëpunimit në zbatimin e ligjit, përmes shkëmbimit të informacionit, të dhënave për mallrat me vlerë të lartë dhe deklarimeve të parasë në kufi, si dhe koordinimit të operacioneve të përbashkëta kundër kontrabandës në pikat kufitare dhe zonat e gjelbra. Bashkëpunimi ndërmjet dy administratave mbështetet në mekanizmat ekzistues të asistencës së ndërsjellë, përfshirë shkëmbimin elektronik të të dhënave dhe përdorimin e sistemit SEED.
Në përfundim, të dyja administratat konfirmuan përkushtimin për forcimin e mëtejshëm të bashkëpunimit, shkëmbimin e përvojave dhe koordinimin e veprimeve, me synim lehtësimin e tregtisë së ligjshme, procedura më efikase dhe forcimin e luftës kundër kontrabandës dhe aktiviteteve të paligjshme.

Bruksel, 25–27 qershor 2026 – Drejtori i Përgjithshëm i Doganës së Kosovës z. Agron Llugaliu po merr pjesë në Sesionet e 147-të dhe 148-të të Këshillit të Organizatës Botërore të Doganave (OBD), të cilat po zhvillohen në Bruksel. Këshilli i OBD-së përfaqëson organin më të lartë vendimmarrës të organizatës, ku marrin pjesë drejtuesit e administratave doganore nga vendet anëtare për të diskutuar prioritetet strategjike dhe zhvillimet më të rëndësishme në fushën doganore.
Gjatë sesioneve, pjesëmarrësit kanë shqyrtuar raportin e Sekretarit të Përgjithshëm dhe raportet e komiteteve teknike të OBD-së, me fokus në zhvillimin e kapaciteteve, standardet dhe politikat doganore, rregullat e origjinës, vlerësimin doganor, nomenklaturën dhe klasifikimin e mallrave, si dhe çështjet që lidhen me zbatimin e ligjit, lehtësimin e tregtisë dhe përdorimin e teknologjisë në procedurat doganore. Në kuadër të agjendës, Këshilli po trajton gjithashtu çështje të politikave institucionale, qeverisjes, financave dhe buxhetit të organizatës, si dhe do të miratojë kalendarin e aktiviteteve dhe sesioneve të ardhshme të OBD-së.
Pjesëmarrja e Drejtorit të Përgjithshëm në këtë forum të nivelit më të lartë ndërkombëtar dëshmon përkushtimin e Doganës së Kosovës për të qenë pjesë aktive e proceseve globale të zhvillimit të politikave doganore, harmonizimit me standardet ndërkombëtare dhe forcimit të bashkëpunimit me administratat doganore të vendeve partnere.
Dogana e Kosovës mbetet e angazhuar në avancimin e reformave, modernizimin e shërbimeve doganore, lehtësimin e tregtisë së ligjshme dhe forcimin e sigurisë së zinxhirit ndërkombëtar të furnizimit, në përputhje me konventat, standardet dhe praktikat më të mira të Organizatës Botërore të Doganave.

Prishtinë, 14 Maj 2026 –  Drejtori i Përgjithshëm i Doganës së Kosovës, z. Agron Llugaliu, priti në takim znj. Jane Donald, e cila shërben në cilësinë e oficeres koordinuese të Doganës Britanike.
Gjatë takimit u diskutua për avancimin e bashkëpunimit ndërinstitucional ndërmjet Doganës së Kosovës dhe institucioneve britanike, me fokus të veçantë në ngritjen e kapaciteteve profesionale, shkëmbimin e përvojave dhe zbatimin e praktikave moderne doganore.
Po ashtu, palët trajtuan çështje që ndërlidhen me forcimin e kontrollit kufitar, menaxhimin e riskut, luftimin e kontrabandës dhe mbështetjen në proceset e modernizimit dhe digjitalizimit të shërbimeve doganore.
Në takim u theksua rëndësia e partneritetit të vazhdueshëm ndërmjet Doganës së Kosovës dhe institucioneve britanike, si dhe u shpreh zotimi i përbashkët për thellimin e bashkëpunimit në fusha me interes të ndërsjellë, me synim forcimin e sigurisë kufitare, rritjen e efikasitetit operativ dhe avancimin e standardeve profesionale.
Dogana e Kosovës vlerëson lartë mbështetjen e vazhdueshme të partnerëve britanikë, të cilët përmes bashkëpunimit profesional kontribuojnë në zhvillimin institucional dhe forcimin e kapaciteteve operacionale në përputhje me standardet ndërkombëtare. 

Dogana e Kosovës sot inauguroi zyrtarisht skanerin e dhuruar nga Qeveria e Shteteve të Bashkuara të Amerikës, me vlerë afër 3 milion dollarë amerikanë.
Ceremonia e prerjes së shiritit u mbajt në prani të Ministrit të Financave, Ministrit të Punëve të Brendshme, Zëvendësdrejtorit të Përgjithshëm të Policisë së Kosovës, të Ngarkuarës me Punë të Ambasadës së SHBA-së, si dhe zyrtarëve të lartë doganorë dhe policorë.
Ky donacion përforcon kapacitetet operative të Doganës dhe Policisë së Kosovës në menaxhimin e rrezikut dhe sigurinë kufitare, veçanërisht në një kontekst të ndjeshëm të sigurisë në rajonin tonë. Skaneri rrit aftësinë për të identifikuar mallra dhe veprimtari të paligjshme, duke garantuar njëkohësisht rrjedhë të sigurt dhe efikase të tregtisë legjitime.
Gjatë ceremonisë së përurimit u theksua se Dogana e Kosovës ka dëshmuar në vazhdimësi rezultate të qëndrueshme, duke dhënë një kontribut të çmuar në mbrojtjen e sigurisë kombëtare, në parandalimin e kontrabandës dhe krimit të organizuar, si dhe në mbledhjen e të hyrave për buxhetin e shtetit.
U theksua gjithashtu roli i rëndësishëm i partnerëve ndërkombëtarë, përfshirë Qeverinë e Shteteve të Bashkuara të Amerikës, Bashkimin Evropian, Britanisë së Madhe, Gjermaninë dhe vende të tjera mike, të cilët kanë kontribuar në mënyrë të vazhdueshme në mbështetjen e përpjekjeve të Kosovës për forcimin e sundimit të ligjit, sigurisë dhe efikasitetit institucional, si shteti më i ri në Evropë.
Skaneri i inauguruar sot, së bashku me skanerët e planifikuar nga Bashkimi Evropian, Gjermania dhe ato të planifikuara nga Qeveria e Kosovës, përmes financimit nga Banka Botërore, përfaqësojnë iniciativën për një forcim strategjik të kapaciteteve ekzistuese të autoriteteve kufitare të Kosovës dhe një investim të rëndësishëm për përballimin e sfidave të ardhshme në fushën e sigurisë dhe tregtisë.
Dogana e Kosovës mbetet e përkushtuar për të mbrojtur kufijtë e vendit, për të garantuar sigurinë e qytetarëve dhe për të ofruar shërbime efikase për ekonominë dhe tregtinë legjitime.

Prishtinë 5 nëntor 2025, Raporti i Komisionit Evropian për Kosovën për vlerëson progresin e Doganës së Kosovës në fusha të rëndësishme, përfshirë: zgjerimin e numrit të terminaleve publike doganore, uljen dhe heqjen e tarifave në terminale private, rritjen e të hyrave krahasuar me vitin paraprak si rezultat i luftimit efikas të ekonomisë jo-formale, luftën kundër mashtrimeve doganore, forcimin e bashkëpunimit institucional dhe ndërkombëtar, zbatimin e masave për mbrojtjen e pronësisë intelektuale, përdorimin e teknologjisë së avancuar dhe inteligjencës artificiale në menaxhimin e rrezikut, si dhe rekrutimin e suksesshëm të stafit të ri që ka forcuar kapacitetet administrative dhe profesionale në organizatë. 

Ky progres është arritur me përkrahjen e Qeverisë dhe bashkëpunimin me partnerët institucional dhe ndërkombëtarë, përfshirë Zyren e BE-së, Ambasadën e SHBA-së, Ambasadën Britanike, Qeverinë Gjermane dhe programet tjera relevante me punën e Doganës.

Fushat kryesore të përparimit të evidentuara në raport:

• Rritje e ndjeshme e të hyrave doganore, me mbi 170 milionë euro të hyra shtesë gjatë vitit 2024, si rezultat i luftës efektive kundër mashtrimeve doganore dhe forcimit të integritetit institucional.
• Zgjerimi i numrit të terminaleve publike dhe heqja e plotë e tarifave të shërbimit në shumicën absolute të pikave kryesore të zhdoganimit, që ka mundësuar lehtësim të ndjeshëm të tregtisë dhe transparencë më të lartë.
• Bashkëpunim i fuqizuar ndërinstitucional dhe ndërkombëtar, përfshirë krijimin e Ekipit të Përbashkët Hetimor me Administratën Tatimore dhe Policinë, si dhe bashkëpunimin e vazhdueshëm me OLAF, që ka sjellë rezultate             konkrete në luftën kundër kontrabandës.
• Rezultate të larta në mbrojtjen e pronësisë intelektuale (IPR) me sekuestrime të mallrave të falsifikuara me vlerë rreth 12 milionë euro, duke mbrojtur bizneset legjitime dhe konsumatorët.
• Zbatimi i banderollave elektronike të akcizës për produktet e duhanit dhe pijet alkoolike, që kontribuon në kontroll më të mirë të tregut dhe rritje të të hyrave buxhetore.
• Vendosja e themeleve për përdorimin e Inteligjencës Artificiale (AI) në sistemet e analizës së rrezikut dhe platformën e inteligjencës së biznesit, një hap i rëndësishëm drejt digjitalizimit të plotë të doganës.
• Efikasiteti i Laboratorit Doganor të akredituar, që ndihmon në lehtësimin e tregtisë dhe sigurinë e produkteve.
• Rekrutimi dhe integrimi i zyrtarëve të rinj doganorë, që ka përforcuar kapacitetet profesionale dhe efikasitetin organizativ të institucionit.
• Vendosja e skanerëve per të promovuar përmirësimin e kontrollave dhe sherbimeve 
• Pjesëmarrja aktive në programet e BE-së (Customs 2020) dhe forumet ndërkombëtare të Organizatës Botërore të Doganave, duke kontribuar në ngritjen e standardeve profesionale dhe përafrimin me praktikat më të mira të BE-së.

Në të njëjtën kohë, Komisioni Evropian ka dhënë disa rekomandime për vitin e ardhshëm, që përfshijnë:
- Fnalizimin e akteve nënligjore për Kodin e ri Doganor dhe të Akcizës;
- Forcimin e kapaciteteve profesionale dhe administrative sipas parimeve të meritës;
- Intensifikimin e luftës kundër kontrabandës në bashkëpunim me OLAF;
- Zhvillimin e sistemeve digjitale dhe miratimin e Strategjisë për Teknologjinë Informative;
- Heqjen e plotë të tarifave të mbetura për eksportuesit dhe importuesit.

Dogana mbetet plotësisht e përkushtuar në zbatimin e rekomandimeve të Komisionit Evropian dhe në avancimin e reformave që forcojnë integritetin, transparencën dhe efikasitetin në shërbim të qytetarëve dhe ekonomisë së Republikës së Kosovës.

Qeveria e Republikës së Kosovës në mbështetje të kompetencave të saja kushtetuese dhe ligjore, përmes vendimit Nr. 13/265 të datës 01.08.2025 ka vendosur heqjen e tarifës doganore për mallrat me origjinë preferenciale nga Shtetet e Bashkuara të Amerikës (SHBA).
Ky vendim ndonëse përfaqëson një masë të njëanshme  nga ana e Republikës se Kosovës, i cili qëllim primar ka  lehtësimin e tregtisë me përfitime konkrete si për bizneset ashtu dhe për konsumatorët e vendit,  është i një rëndësie të  veçantë  edhe sa i përket  forcimit dhe avancimit të marrëdhënieve në sferën tregtare  dhe ekonomike në raport me Shtetet e Bashkuara të Amerikës. 
Vendimi për aplikimin e tatimit doganor  me normë zero për mallrat e importuara me origjinë nga SHBA është i bazuar  në Ligjim nr. 04/L-163 dhe në  Kodin Doganor dhe të Akcizave Nr. 08/L-247, andaj mbi këtë bazë, mallrat të cilat importohen nga SHBA e të cilat  plotësojnë kriteret  e origjinës preferenciale,  që nga data e hyrjes në fuqi  të  vendimit dhe publikimit të tij në gazetën zyrtare 01.08.2025 ,  mund të importohen në territorin doganor të Republikës së Kosovës pa pagesë të tarifës doganore. 
Në mënyrë që këto mallra të përfitojnë nga ky trajtim favorizues, të njëjtat me rastin e importit duhet të shoqërohen  me:

• Certifikatë të vlefshme të origjinës preferenciale të lëshuar nga  autoritetet amerikane
• Deklarata për origjinën në faturë, në përputhje me ligjin në fuqi të të dyja vendeve.

Të gjitha mallrat e importuara nga Shtetet e Bashkuara të Amerikës nga data 01.08.2025, të cilat përmbushin kriteret për t’u trajtuar si mallra me origjinë preferenciale, por që në momentin e importit nuk kanë përfituar këtë trajtim, do t’u nënshtrohen procedurave për rimbursim të detyrimeve doganore, në përputhje me dispozitat në fuqi.

Për më shume  informacione rreth mënyrës së aplikimit të trajtimit preferencial dhe dokumentacionit të nevojshëm, të gjithë operatorët ekonomikë që importojnë mallra nga SHBA ftohen të kontaktojnë Doganën e Kosovës për udhëzime të mëtejshme.

Ankara, 1 korrik 2025  — Drejtori i Përgjithshëm i Doganës së Kosovës, z. Agron Llugaliu, realizoi një takim zyrtar me z. Sezai Uçarmak, Zëvendësministër i Tregtisë dhe njëherësh udhëheqës i Administratës Doganore të Republikës së Turqisë. Takimi u mbajt në Ankara dhe shënoi një hap të rëndësishëm në forcimin e bashkëpunimit ndërinstitucional ndërmjet dy administratave doganore.
Gjatë takimit, palët diskutuan një sërë çështjesh me interes të përbashkët, përfshirë modernizimin e shërbimeve doganore, shkëmbimin e përvojave dhe praktikave më të mira në fushën e teknologjive të avancuara si inteligjenca artificiale (AI) dhe teknologjia blockchain, me synim përmirësimin e efikasitetit dhe transparencës në operacionet doganore.
Një moment i veçantë i takimit ishte nënshkrimi i një Deklarate të Përbashkët të Angazhimit për Bashkëpunim Teknik, e cila përcakton kornizën për bashkëpunim të mëtejmë në nivele teknike, në fushat e shkëmbimit të informatave, trajnimeve profesionale dhe zhvillimit të kapaciteteve.
Ky takim konfirmon vullnetin e dy administratave për të avancuar marrëdhëniet miqësore dhe profesionale, duke kontribuar në sigurinë, tregtinë e lirë dhe zhvillimin ekonomik në rajon dhe më gjerë.

Drejtori i Përgjithshëm i Doganës së Kosovës, z. Agron Llugaliu, së bashku me bashkëpunëtorë, ka marrë pjesë në punimet e Sesionit të 145-të/146-të të Këshillit të Organizatës Botërore të Doganave (OBD), që u mbajt në selinë qendrore të organizatës në Bruksel, nga data 26 Qershor deri më sot.
Gjatë punimeve të Këshillit u trajtuan çështje thelbësore për zhvillimin dhe orientimin strategjik të bashkëpunimit doganor ndërkombëtar, përfshirë:
Konsolidimin e kapaciteteve institucionale dhe teknike, përmes harmonizimit të standardeve dhe përmirësimit të cilësisë së zbatimit në terren;
Zhvillimin e mekanizmave për kontroll të bazuar në rrezik dhe lehtësim të tregtisë, me qëllim rritjen e sigurisë dhe efikasitetit në zinxhirët ndërkombëtarë të furnizimit;
Vendimmarrjen strategjike dhe qeverisjen globale doganore, që udhëheq orientimet afatgjata të Organizatës Botërore të Doganave dhe koordinimin ndërmjet administratave anëtare.
Në margjinat e sesionit, z. Llugaliu gjithashtu zhvilloi një takim me Sekretarin e Përgjithshëm të OBD-së, z. Ian Saunders, ku shprehu falënderimin për bashkëpunimin e deritanishëm dhe diskutoi mundësitë për thellim të partneritetit mes Doganës së Kosovës dhe OBD-së.
Dogana e Kosovës mbetet e përkushtuar për të kontribuar në bashkëpunimin ndërkombëtar, për të avancuar praktikat bashkëkohore dhe për të fuqizuar rolin e doganave në zhvillimin ekonomik dhe sigurinë kombëtare.

Prizren, 10 qershor 2025 – Sot, në Pikën Kufitare të Vër micës, gjatë një kontrolli të përbashkët të realizuar nga Dogana e Kosovës dhe Policia Kufitare, është selektuar për kontroll të detajuar në vijën e dytë automjeti me targa kosovare.   
Gjatë ekzaminimit të detajuar të automjetit, zyrtarët doganorë kanë hasur mjete monetare të padeklaruara në shumë totale prej 17,950.00 euro, të ndara në këto prerje:
• 74 kartëmonedha nga 100 euro – 7,400.00 euro
• 211 kartëmonedha nga 50 euro – 10,550.00 euro
Në mungesë të deklarimit paraprak dhe dokumentacionit mbi prejardhjen e mjeteve, Dogana ka bëre sekuestrimin e mjeteve derisa në përputhje me nenin 33.5 të Kodit Doganor dhe të Akcizës së Kosovës (KDAK), palës automatikisht i është bërë konfiskimi i shumës prej 4,487.50 euro – që përfaqëson 25% të shumës totale të padeklaruar derisa edhe pjesa tjetër mbahet deri në përfundimin e procedurave hetimore. 
Dogana e Kosovës rikujton të gjithë qytetarët dhe udhëtarët që të deklarojnë saktësisht mjetet monetare mbi 10000 mijë euro të cilat i mbajnë me vete gjatë hyrjes apo daljes nga territori doganor i Republikës së Kosovës, në përputhje me legjislacionin në fuqi, me qëllim të parandalimit të veprimtarive të paligjshme financiare dhe për të shmangur ndëshkime të panevojshme.

Prizren/Vërmicë – Drejtori i Përgjithshëm i Doganës, z. Agron Llugaliu, pati kënaqësinë të mirëpresë një delegacion të nivelit të lartë nga Deutsche Gesellschaft für Internationale Zusammenarbeit (GIZ) GmbH, të udhëhequr nga Drejtoresha Menaxhuese e GIZ, znj. Ingrid-Gabriela Hoven, e shoqëruar nga Drejtori i Divizionit për Ballkanin Perëndimor, z. Daniel Passon, dhe Drejtori i GIZ për Kosovë, z. David Oberhuber, me bashkëpunëtorë. Takimi shpalosi bashkëpunimin e vazhdueshëm ndërmjet Doganës së Kosovës, rajonit dhe aktorëve ndërkombëtarë, me qëllim avancimin e modernizimit, efikasitetit dhe transparencës në operacionet doganore.
Drejtori Llugaliu prezantoi arritjet dhe reformat kryesore të ndërmarra ndër vite, duke vënë theksin në bashkëpunimin me GIZ-in gjerman. Përtej përkrahjes në agjendën e integrimeve evropiane, bashkëpunimi me GIZ-in për Doganën e Kosovës ka rezultuar ndjeshëm në përmirësimin e efikasitetit të organizatës në shumë dimensione.
Ndër kryesoret në bashkëpunim me GIZ-in kanë qenë reformat dhe zhvillimet në integrimin rajonal, ku GIZ-i ka përkrahur vendet e rajonit të Ballkanit Perëndimor për të avancuar dhe afruar praktikat dhe përdorimin e sistemeve të përbashkëta, me qëllim të avancimit edhe të integrimeve evropiane.
Me përkrahjen e GIZ-it, Dogana ka pasur zhvillime me rëndësi edhe në projektin e rekrutimit të gjeneratës së fundit të zyrtarëve doganorë, duke siguruar praktika të mira që ofrojnë garanci për përzgjedhje me meritokraci, me qëllim që të sigurojë transformim efikas të Doganës së Kosovës për t’u përballur me sfidat e së ardhmes.
GIZ-i ka ofruar gjithashtu përkrahje të rëndësishme edhe në lehtësirat tregtare, duke përfshirë fushën e Operatorëve Ekonomikë të Autorizuar, avancimin e sistemit për administrimin e dërgesave të shpejta, hartimin e legjislacionit doganor në harmoni me atë të BE-së, avancimin e sistemeve, përfshirë aplikimin e Inteligjencës Artificiale, ku Dogana e Kosovës, në sajë të studimit me ekspertin e ofruar nga projekti i BE-së dhe i implementuar nga GIZ-i, ka kryer prokurimin e një platforme të avancuar për menaxhimin e procesit me të dhëna, në të cilën përfshihet po ashtu Inteligjenca Artificiale. GIZ-i ka ndihmuar edhe në sigurimin e skanerëve, të ofruar si dhuratë nga Qeveria Gjermane dhe BE-ja, projekt ky i cili është në proces.
GIZ-i gjithashtu ka ndihmuar në zhvillimin e njësisë së specializuar të qenve nuhatës (K9), andaj, si pjesë e vizitës, delegacioni i GIZ-it vizitoi pikën e kalimit kufitar të Vërmicës, ku demonstroi njësia K9 – me ç’rast Drejtoresha Menaxhuese, znj. Hoven, u shpreh e lumtur me efikasitetin e bashkëpunimit, duke siguruar interes për bashkëpunim të mëtejshëm me qëllim që sukseset e arritura në Doganën e Kosovës të ndahen edhe me vendet e tjera ku GIZ-i ka shtrirje.

Një ditë frymëzuese për kadetët e Doganës, të cilët dëgjuan ligjëratën e Drejtorit të Përgjithshëm mbi rëndësinë e integritetit, mësimit të vazhdueshëm, profesionalizimit, gatishmërinë për reziliencë në profesion dhe nevojën për fokus në misionin fisnik të zyrtarit doganor, për të mbrojtur shoqërinë, duke ju referuar sfidave e sakrificës së madhe të popullit tonë për pavarësinë dhe krijimin e institucioneve të shetit tonë të dashur. Siç u theksua, këto vlera janë shtyllat me të cilat mund të ndërtojmë besimin dhe efikasitetin tonë.
Me këtë rast, dëshirojmë të theksojmë se në rekrutimin e fundit, Dogana e Kosovës ka mirëpritur 115 kandidatë të suksesshëm, të cilët janë një aset i jashtëzakonshëm për institucionin tonë dhe të ardhmen e Doganës së Kosovës.
Ne jemi veçanërisht mirënjohës për mbështetjen e Ministrit Hekuran Murati për të siguruar një proces me integritet të plotë, ndërsa që nga aspekti profesional jemi shumë mirënjohës Zyrës së Bashkimit Evropian, e cila ofroi ekspertizën e një specialisti të Burimeve Njerëzore. Ky bashkëpunim i çmuar me stafin tonë siguroi një proces rekrutimi efikas dhe profesional, duke garantuar një përzgjedhje të bazuar plotësisht në meritë.
I urojmë mirëseardhjen stafit tonë të ri! Jemi të angazhuar të sigurojmë një integrim efikas të tyre. Energjia dhe perspektivat e tyre të reja, së bashku me shumë pëprpjekje tjera për dixhitalizim e avancim të proceseve, do të jenë thelbësore në transformimin e Doganës së Kosovës drejt një brezi të ri të shërbimit publik.
Bashkë, ndërtojmë një doganë të fortë dhe të besueshme për Kosovën!

Sot shënuam një ngjarje të rëndësishme për qytetarët e dy vendeve tona.
Qeveritë e Republikës së Kosovës dhe Republikës së Maqedonisë së Veriut kanë dakorduar marrëveshjen dhe protokollin e bashkëpunimit që ka mundësuar ekipeve të doganave dhe policive kufitare të të dyja vendeve të vendosin një pikëkalim të përbashkët kufitar në Hani i Elezit – Bllacë, i bazuar në parimin e vetëm një kontrolli – atë në hyrje të shtetit pritës.
Ky model do të ndihmojë ndjeshëm qytetarët tanë që të kalojnë kufirin më lehtë dhe më shpejt, duke reduktuar kohën e pritjes dhe procedurat, ndërkohë që niveli i kontrollit mbetet i lartë falë integrimit të sistemeve tona teknologjike dhe shkëmbimit të të dhënave në kohë reale. Bashkëpunimi ndërmjet autoriteteve doganore dhe policore tashmë do të jetë edhe më efikas.
Në ceremoninë e përurimit, Kryeministrat e të dy vendeve, Ministrat e Punëve të Brendshme dhe Zëvendëskryeministri i Qeverisë së Maqedonisë së Veriut, z. Izet Mexhiti, theksuan dobitë e shumta që sjell ky sistem i avancuar kufitar.
Drejtori i Përgjithshëm i Doganës së Kosovës, z. Agron Llugaliu, gjatë kësaj vizite takoi homologun e tij, Drejtorin e Përgjithshëm të Doganës së Maqedonisë së Veriut, z. Boban Nikolovski, ku u ritheksua rëndësia e bashkëpunimit të ngushtë për zbatim të përbashkët të marrëveshjes dhe avancim të standardeve të shërbimit doganor.
Gjithashtu, z. Llugaliu shoqëroi Zëvendësministrin e Financave të Kosovës, z. Agon Dobruna, në takimin me Ministren e Financave të Maqedonisë së Veriut, znj. Gordana Dimitrieska-Koçoska, ku u theksua rëndësia e vazhdimit të bashkëpunimit ndërinstitucional dhe përmirësimit të shërbimeve nëpërmjet shkëmbimit të përvojave dhe praktikave më të mira.