CEREMONIA E TRANZICIONIT TË KOMPETENCAVE
Lajme
12 December 2008
CEREMONIA E TRANZICIONIT TË KOMPETENCAVE
PRISHTINË, 12 dhjetor 2008- Shërbimi Doganor i UNMIK-ut sot në një ceremoni të organizuar u shndërrua në Doganën e Kosovës, gjë që shënon edhe fundin e bartjes së kompetencave nga UNMIK-u, tranzicion i cili ka filluar para 6 muajve.
Kodi i ri doganor i miratuar me 11 nëntor 2008 nga Kuvendi i Kosovës, mundësoi që tranzicioni i filluar të përfundoj sot përmes kësaj ceremonie solemne. Kodi doganor në fjalë është në pajtim të plotë me standardet ligjore të Bashkimit Evropian dhe ndër të tjra ka si objektiv edhe zhvillimin ekonomik të Republikës së Kosovës
“Sot ne së bashku kurorëzojmë përpjekjet e Qeverisë së Kosovës për të qenë të mëvetësishme në të gjitha degët strategjike e sidomos në pjesën e legjislacionit dhe ekzekutivit ku doganat e Kosovës do të shtrihen në tërë territorin e Kosovës”, tha në fjalën e rastit Ministri i Ekonomisë dhe Financave, zoti Ahmet Shala.
“Doganat shtoi ai, kanë tejkaluar të ardhurat e parashikuara këtë vit dhe uroj që vitin tjetër ky sukses të rritet edhe më tej.”
