Lajmet Artikulli

Bruksel, 25–27 qershor 2026 – Drejtori i Përgjithshëm i Doganës së Kosovës z. Agron Llugaliu po merr pjesë në Sesionet e 147-të dhe 148-të të Këshillit të Organizatës Botërore të Doganave (OBD), të cilat po zhvillohen në Bruksel. Këshilli i OBD-së përfaqëson organin më të lartë vendimmarrës të organizatës, ku marrin pjesë drejtuesit e administratave doganore nga vendet anëtare për të diskutuar prioritetet strategjike dhe zhvillimet më të rëndësishme në fushën doganore.
Gjatë sesioneve, pjesëmarrësit kanë shqyrtuar raportin e Sekretarit të Përgjithshëm dhe raportet e komiteteve teknike të OBD-së, me fokus në zhvillimin e kapaciteteve, standardet dhe politikat doganore, rregullat e origjinës, vlerësimin doganor, nomenklaturën dhe klasifikimin e mallrave, si dhe çështjet që lidhen me zbatimin e ligjit, lehtësimin e tregtisë dhe përdorimin e teknologjisë në procedurat doganore. Në kuadër të agjendës, Këshilli po trajton gjithashtu çështje të politikave institucionale, qeverisjes, financave dhe buxhetit të organizatës, si dhe do të miratojë kalendarin e aktiviteteve dhe sesioneve të ardhshme të OBD-së.
Pjesëmarrja e Drejtorit të Përgjithshëm në këtë forum të nivelit më të lartë ndërkombëtar dëshmon përkushtimin e Doganës së Kosovës për të qenë pjesë aktive e proceseve globale të zhvillimit të politikave doganore, harmonizimit me standardet ndërkombëtare dhe forcimit të bashkëpunimit me administratat doganore të vendeve partnere.
Dogana e Kosovës mbetet e angazhuar në avancimin e reformave, modernizimin e shërbimeve doganore, lehtësimin e tregtisë së ligjshme dhe forcimin e sigurisë së zinxhirit ndërkombëtar të furnizimit, në përputhje me konventat, standardet dhe praktikat më të mira të Organizatës Botërore të Doganave.

Prishtinë, 21 tetor 2026 – Në Prishtinë ka nisur punëtoria “On Strengthening Customs Valuation Capacity”, e organizuar në kuadër të Customs Programme. Ky aktivitet po mbahet për herë të parë në Kosovë, me pjesëmarrjen e përfaqësuesve të DG TAXUD, Gjermanisë, Francës, Portugalisë, Finlandës, Sllovenisë, Kroacisë, Shqipërisë, Malit të Zi, Turqisë, Maqedonisë së Veriut dhe Kosovës.
Punëtoria u hap nga përfaqësuesit e DG TAXUD, të cilët vlerësuan organizimin dhe mikpritjen e Doganës së Kosovës.
Drejtori i Përgjithshëm i Doganës së Kosovës, z. Agron Llugaliu, u uroi mirëseardhje pjesëmarrësve dhe shprehu kënaqësinë që Kosova është nikoqire e këtij aktiviteti ndërkombëtar. Ai theksoi rëndësinë e bashkëpunimit institucional për shkëmbimin e përvojave, zbatimin e praktikave më të mira dhe forcimin e kapaciteteve profesionale.
Gjatë dy ditëve, 21–22 tetor 2026, pjesëmarrësit do të diskutojnë për legjislacionin dhe metodat e vlerësimit doganor, vendimet përkatëse të Gjykatës së BE-së, si dhe raste praktike e përvoja nga administratat pjesëmarrëse.
Organizimi i kësaj punëtorie dëshmon forcimin e bashkëpunimit me institucionet evropiane dhe administratat doganore pjesëmarrëse në Customs Programme, si dhe përkushtimin e Doganës së Kosovës për avancimin e kapaciteteve profesionale dhe përafrimin me standardet dhe praktikat e BE-së.