Lajmet Artikulli

Ministri i Financave Besim Beqaj ka thënë sot se Dogana e Kosovës gjatë këtyre viteve ka luajtur  një rol qenësor në grumbullimin e të hyrave për buxhetin e Kosovës dhe përpos rolit të tyre tradicional (në mbledhjen e taksave), Dogana secilën herë e më shumë është përballur dhe i është përgjigjur kërkesave për t’i kontribuar ambientit të sigurisë së vendit dhe mbrojtes së shëndetit të qytetarëve .

“Me rritjen e vazhdueshme të tregtisë dhe transaksioneve tregtare, kërkesave nga institucionet qeveritare dhe komuniteti i biznesit për krijimin e kushteve për tregti të lirë, përkatësisht përshpejtim të procedurave të zhdoganimit ,Dogana iu është përgjigjur duke ngritur dhe përforcuar kapacitetet në fushën e zbatimit të ligjit, me qëllim të lehtësimit të tregtisë legjitime dhe luftimit të krimit dhe kontrabandës, duke ndërtuar sistem adekuat, përforcuar sektorët gjegjës dhe institucionin në tërësi”, tha ministri Beqaj me rastin e hapjes së fillimit të trajnimit për zyrtarët doganor të përkrahur nga Dogana e Mbretërisë së Bashkuar ku mori pjesë edhe Ambasadori i Mbretërisë së Bashkuar Ian Cliff. 

Me këtë rast ministri Beqaj tha se Dogana e Kosovës ka përfituar në vazhdimësi nga përvojat dhe profesionalizmi i zyrtarëve të Doganës së Britanisë së Madhe dhe është krijuar një përafrim i qasjes se si Dogana e Kosovës ka të organizuar strukturat e saja operative dhe ky trajnim është një kontribut i mirëpritur, pasi që do t’i kontribuoj përmirësimit të mëtejshëm të kapaciteteve të tërësishme të Doganës së Kosovës.

 “Ne jemi mirënjohës për kontributin e dhënë nga Britania e Madhe në të gjitha fushat dhe presim që edhe në të ardhmen të kemi bashkëpunim të frytshëm”, tha  ministri Beqaj.

Ambasadori Cliff theksoi se Dogana e Kosovës është institucion i cili që nga pas-lufta ka gëzuar mbështetje nga Mbretëria e Bashkuar. 

“Ne jemi shumë të gëzuar për marrëdhëniet e mira të bashkëpunimit që kemi me Doganën e Kosovës dhe me profesionalizmin që ky institucion vazhdon të tregojë – andaj mbetemi të përkushtuar në mbështetjen e tij të mëtutjeshme. Shpresojmë se edhe trajnimi i sotëm i cili do të mbahet nga zyrtarë të Doganës Britanike, do kontribuojë në rritjen e mëtutjeshme të kapaciteteve dhe do ta ndihmojë këtë institucion të vazhdojë të jap rezultate të mira në punë”, tha Ambasadori Cliff.

Prishtinë, 11 shtator 2013 – Dogana e Kosovës është duke vazhduar me aktivitete operative për parandalimin dhe luftimin e kontrabandës. Gjatë muajit të fundit janë ndërmarr shumë aktivitete/operacione me qëllim të luftimit dhe parandalimit të kontrabandës, si dhe ka pasur rritje të kontrollit në pikë kalimet kufitare, me ç’ rast janë konfiskuar mallra të ndryshme si: produkte farmaceutike; derivate të naftës (në disa raste); pije të gazuara; mallra të ndaluara dhe mallra të
ndryshme komerciale.

Gjatë një operacioni të ndërmarrë më datën 7 shtator në rajonin e Mitrovicës, njësitet Anti- kontrabandë të Doganës së Kosovës, kanë përcjell një veturë të cilën ngasësi e kishte braktisur, ku më pas Oficerët Doganor e kanë kontrolluar veturën dhe kanë zbuluar 2 bidonë me nga 1000 litra derivate të naftës. Po ashtu, në rajonin e Mitrovicës gjatë kësaj periudhe janë zbuluar edhe tri raste tjera me nga 2500 litra derivate të naftës. E tërë sasia e zbuluar është konfiskuar nga oficerët Doganor.

Gjatë kësaj periudhe, Oficerët Doganor kanë zbuluar 5 revole dhe 120 copë fishekë nëpër pika të ndryshme si në Han të
Elezit, Vermicë, Dheu i Bardhë etj. Të gjitha rastet e zbuluara nga Dogana e Kosovës me mallra të ndaluara i janë dorëzuar Policisë së Kosovës për procedurë të mëtutjeshme.

Raste tjera të parandaluara në tentim kontrabandimi, janë zbuluar edhe në Aeroportin ndërkombëtar të Prishtinës, ku vlen të përmenden stoli ari në vlere prej 1700 euro.

Po ashtu, gjatë kësaj periudhe duke përfshirë të gjitha pikat kufitare ka pasur zbulime të mallrave të ndryshme, ndër to medikamente në vlerë rreth 600 euro, pajisje stomatologjike në vlerë rreth 1000 euro dhe tekstil të ndryshëm rreth 2800 euro, si dhe janë ndalur  edhe 18 automjete të pa zhdoganuara.

Të gjitha rastet e regjistruara si kontrabandë me mallra u janë dorëzuar sektorit për Kundërvajtje doganore, ndërsa rastet me mallrat e ndaluara u janë dorëzuar Policisë së Kosovës, ku ndaj të dyshuarve janë iniciuar procedura për kontrabandim me mallra.